السلام عليكم ورحمة الله وبركاته

انا الاول عزماكوا كلكوا على حنتي

النهاردة الحنة يا بنات

الجزء الـ 13


( الحنة )

من الصبح سمعت حركة كتيرة في البيت

صحيت لقيت ماما واخواتي يا عيني بيحضروا في الاكل من بدري

ومش رضيوا يصحوني علشان انام براحتي

فطرت فطار خاص

علشان انا عروسة بقى والمفروض اكل كويس

بعد ما فطرت روحت اساعدهم مرضيوش وقالوا : خليكي انتي استريحي

المهم دخلت اخدت دش وبعدين بدأت احضر لبس الحنة إلى هلبسه النهاردة

حضرت طقم الحنه



والصندل



وعلى الظهر روحت للكوافيره تكمل الماسك بتاع كل يوم

وبعدين رجعت على البيت قبل العصر بحاجه بسيطة

لقيت اهلى كلهم عندنا

خلاني وخالاتي وعمي وعمتى

سلمت عليهم وباركولي

وبعدين اتجهزت السفرة واتغدوا كلهم ماعدا انا

دخلت اوضتي وجابت ماما اكلي في الاوضة علشان اكل براحتي

الصراحة كلت كتير جدا لأن اكل ماما لا يعلى عليه ويفتح النفس وماما حبيبتي كانت متوصيه بيا جدا

يعني كانت عامله الاكل بتاعي فرخة وطبق مليان كفته وطبق رز وطبق سلطة

بس طبعا مأكلتش الحاجات دي كلها

كلت لحد ما شبعت

بعد ما خلصوا الغدا شغلوا اغاني الافراح وقعدوا يصقفوا وانا في اوضتي


لقيت ماما جايه تنادي عليا وتقولي : يلا اطلعي علشان تقعدي مع اهلك

قلت لها : حاضر يا ماما هو انتوا بدأتوا الفرح بدري كده ليه

ماما : يا بنتي هما فرحانين ، يلا بقى اطلعي

طلعت وانا بلبس البيت لأنه مش معقول من العصر هلبس لبس الحنة لحد بالليل

قعدوا يصقفوا وعمتي شدتني ورقصتني وطبعا مفيش رجاله أغراب كلهم من محارمي

وفضلنا كده لحد المغرب

صلينا المغرب وبعدها بدئوا المعازيم يجوا

صديقاتي وصديقات اخواتي وباقي اهلي والجيران

في ناس بتنقط العروسة ( تدي هديه للعروسة ) في الحنة وفي ناس بتستنى للصباحيه وتيجي تنقطني في بيتي

والنقوط إللي بيجي في بيت بابا ممكن ام العروسة تسيبها في البيت وممكن توديها بيت العروسة

وفي إللي مش هيقدر يجي يصبح عليا ينقطي في الحنة


الحاجات دي كلها لازم ناخد بالنا منها كويس علشان نردها لهم في افراح ليهم

المهم دخلت لبست الطقم بتاعي

وعملت التسريحه دي



وروحت لمكان الستات

لأن الشقة عندنا خلينا فيها قسمين

قسم حريمي وقسم رجالي

علشان البنات يقعدوا براحتهم ونرقص براحتنا

قعدت في وسط صديقاتي

واغاني الافراح شغاله والكل بيرقص وطبعا رقصت


عمتي سألت ماما : فين الحنة؟

ماما : موجوده بس هنعمل بيها ايه ، محدش هيحط حاجة

عمتي : هاتيها بس

المفروض طبعا العروسة تحني ايدها ورجليها

بس احنا عندنا في البيت مش بنحب كده

ماما تعملها وإللي عايز حنه ماما تديله

المهم ماما جابت الحنة لعمتي

عمتي راحت نادت على كل الاطفال الموجودين في البيت


عمتي : تعالوا يا ولاد خدوا حنه

وفعلا كل اطفال البيت راحوا اخدوا حنة وحطوها في ايدهم ، وكانوا مبسوطين جدا

وبعدها وزعوا الحاجة الصاقعة

العريس بقى في الفتره دي برضوا بيعملوا نفس الحكاية

فرح في البيت ومعازيم

بس طبعا مش بيتحنى

الستات بس بيتحنوا

وحوالي الساعة 10 لقيت بابا بينادي عليا


بابا : يا وداد

انا : نعم يا بابا

بابا : تعالي يا حبيبتي عريسك هنا

مصدقتش نفسي

لأن المفروض ان العريس بيعمل حنه عنده في البيت ومش فاضي يجي لعروسته

بس المفاجأة انه جه عندنا

طلعت بسرعة سلمت عليه


انا : ازيك يا حبيبي ، انت جيت ليه ؟

( وبعدين قلت دي كلمة اقولها ، قلت اصلح الموقف بسرعة )

انا : اقصد انت سيبت الفرح عندكم ليه؟ هو انتوا خلصتوا ؟

زوجي : لسه الفرح شغال سيبتوهم وجتلك يا حبيبتي

انا : يا حبيبي ، ربنا ما يحرمني منك

زوجي : ولا يحرمني منك يا حبيبتي

وطلعنا كل الضيوف في الصالة لأنها واسعه

وقعدت انا وزوجي جنب بعض زي الكوشة بالضبط

وفضلوا يصقفوا ويرقصوا لحد الساعة 11 راحت ماما نادت على الستات يدخلوا يتعشوا في اوضة لوحدهم

والرجاله في اوضه تانيه

واتعشوا كلهم وسابوني انا وزوجي في الصالون نتعشي لوحدنا


هو كان مش عايز يتعشى بس انا قلت له : علشان خاطري تتعشى معايا

زوجي : حاضر يا حبيبتي ، انتي خاطرك عندي غالي

واتعشينا وبعدين روح وخلص الفرح عندنا حوالى الساعة 1 بالليل

طبعا كنت منهكه جدا وعايزة انام

لقيت ماما يا عيني هي واخواتي بيحضروا الاتفاق بتاعي

الاتفاق ده عبارة عن اكل يكفي العروسة لمده اسبوعين او اكتر دا غير الحاجات إلي موجوده اصلا في بيت العروسه

زي اللحمه والفراخ والرز والمكرونة ولسان عصفور وسكر وشاي وعصاير وبيض والتوابل والجبن

يعني كل تموين البيت لازم يكون في بيت العروسة

لقيت ماما بتعمل صواني مكرونة بالبشاميل



وصواني رقاق باللحمة المفرومه



وفراخ بتسلقها علشان بكره تحمرهم وتوديهم على الشقة



واهم حاجة في الاتفاق الحمام المحشي بالفريك



دا لازم يكون موجود في الاتفاق

(معلشي جوعتكم)

طبعا مقدرتش اساعدهم وروحت نمت على طول


وإلى اللقاء في الجزء الجديد

( ليلة الدخله )

تابعوا معي

وكلكم معزومين على الفرح
إقرأ المزيد Résuméabuiyad