السلام عليكم ورحمة الله وبركاته

نبدأ الجزء التاسع على بركة الله

( حفلة الشبكة )

بعد ما وصل خطيبي للكوافيره اخذني وركبنا السيارة المزينة بالورود



واختى وصديقتي ركبت في عربية بابا

واخوات العريس ركبوا عربية تانية

فكان هناك حوالي 7 عربيات بيزفوني

منهم قرايبي ومنهم قرايب خطيبي

ركبت جنب خطيبي في العربية وطلعنا نتجول في الشوارع الرئيسية وخلفنا باقي العربيات

بيب بيب بببيب

وروحنا لنافورة موجوده بوسط البلد عندنا لفينا بالعربيات حوليها



مش عارفه ايه الحكمه من كده

بس في بلدنا اي عروسة لازم ياخدوها وعلى النافورة ويلفوا حوليها بالعربيات وعلى زمارة العربيات

المهم بعد ما لفينا روحنا للإستوديو علشان نتصور

دخلت انا وخطيبي فقط لغرفة التصوير

وبدأ المصوراتي يطلب منا اننا نعمل حركات علشان التصوير

ولكن الحمد لله مسمعتش كلامه

المصوراتي : يلا يا عريس قرب من عروستك وحط ايدك على وسطها

انا : اوعى ، لالالالا بلاش

خطيبي : متخافيش هحطها من بعيد علشان بس الصور، من غير ما تقولي ياحبيبتي

واخدنا شوية صور وبعدين طلعنا على قاعة الافراح

وطبعا العربيات بتزفنا بس كان اكتر قرايبي وقرايب العريس مستنينا في القاعة ومن ضمنهم ماما وبابا علشان يستقبلوا المعازيم

الشباب بس والبنات هما إلي بيرحوا يزفوا العروسة او اي حد عنده عربية

وانا في العربيه

خطيبي : ايه القمر ده

انا : ..... (اكتفيت بإبتسامة خجل )

خطيبي : بموت فيكي وانتي مكسوفه

انا : بطل بقى

خطيبي : ربنا يخليكي ليا ويقدرني اسعدك

انا : ويقدرني انا كمان اسعدك

ووصلنا للقاعة

نزل خطيبي وبسرعة جالي من الباب التاني وفتح الباب

خطيبي : اتفضلي يا اميرتي

خرجت من العربية وبدأت صديقاتي واخواتي يضبطوا الفستان والجيبونا وما ادراكوا منها بتاعة كده كل مهمتها انها تلخم العروس وخلاص

ودخلنا القاعة على الاغاني وجلسنا في الكوشة



وجلس المعازيم على الكراسي

وبدأت الاغاني من الدي جي

اصدقاء خطيبي جوم لخطيبي وشدوه علشان يرقص وفعلا بدأوا يرقصوا مع بعض

وانا غلبانه في الكوشه لوحدي

جت صديقتي نور وجلست جنبي

وبعدين فجأة لقيت نور وبعض صديقاتي بيشدوني علشان ارقص

ونزلوني من الكوشة انا كمان

وبقى في مجموعتين

مجموعة الشباب وفي وسطهم خطيبي

ومجموعة من البنات وانا وسطهم

بس رفضت ارقص وكنت بصقف بس

وبعد شويه لقيت خطيبي دخل وسط البنات وشدني قلت دا هيرقص معايا ولا ايه؟!

لكن لقيته شدني وخرجني من وسط البنات وبعدين همس في وداني

خطيبي : اوعي تكوني بترقصي

انا : لا والله مش برقص انا بصقف بس

خطيبي : كويس ، يلا بقى نروح على الكوشة

ورجعنا تاني لمقرنا الرئيسي ( الكوشة )

وفضلوا الشباب بيرقصوا والبنات بترقص بس كل مجموعة لوحدها زي ما قلت

خطيبي : مبسوطة يا حبيبتي

انا : انا مبسوطة طول ما انت معايا

خطيبي : بحبك

سكت ،ومن كسوفي قلت اتوه في الموضوع

انا : انت بقى بترقص ومش عايزني ارقص؟

خطيبي : يا حبيبتي انا مش عايز حد يشوفك وانتي بترقصي غيري انا وبس

وقطع كلامنا الرومانسي وللمرة الثانية الشباب جوم اخدوا خطيبي من جنبي

وهو قايم مال عليا وقال : اوعي ترقصي

انا : حاضر

بقيت عايزة اضربهم واقولهم : سيبوا خطيبي جنبي شويه

وفضل هو بيرقص مع اصحابه وانا على الكوشه وصحباتي واخواتي جنبي

وبعدين جيه خطيبي وقعد جنبي

وطبعا كل البنات نزلوا من الكوشة علشان العريس جه

جت ماما بالشبكة وكل الستات قعدوا يزغردوا

لولولولولولولولي

فتحت ماما علبة الشبكة وبدأت تناول خطيبي حاجة حاجة

وكنت قبلها وضعت الدبلة والانسيال والخاتميين

وما شاء الله شكل العلبة كان مبهر جدا

وكاميرات الفيديو بتصور

اول حاجة لبسني الدبلة



قعد يلبسني فيها ربع ساعة علشان التصوير

وكل واحد ماسك كاميرا يقول لخطيبي : براحتك يا عم علشان نلحق نلقط صورة وانت بتلبسها

وبعدين الخواتم



وبعدين الانسيال والسلسلة إلي قعد فيها ربع ساعة علشان يقفلها وفي الآخر جت اخته قفلتها لأن ايده كانت بترتعش من الموقف

وبعدين الاسورة

لكن الحلق طبعا متلبسش علشان مكنش ينفع البسه وانا لابسه الطرحه

وبعد كل ده فضلت دبلته في العلبة زي المسكينة



اخدتها ولبستها له وانا ايدي بترتعش جدا

يا حرام شوفوا انا لبست اد إيه وهو يا عيني لبس دبله وكمان فضه

ههههههههههههه

وبعد ما خلصنا تلبيس الشبكة

وزعوا البيبسي على الكل

وجابوا لينا كاسين فيهم البيبسي



وجه المسئول عن القاعة ووقف بين كرسيين الكوشة إلي انا وخطيبي قاعدين عليه

المسئول : يلا شربوا بعض

وطبعا معرفتش اشرب حاجة منه لكن انا عرفت اشربه

المسئول : اشربي يا عروسة من الكاس بتاعك وبعدين اديه للعريس يشرب منه

شربت وبعدين اديت الكاس لخطيبي

المسئول : لا يا عروسة شربيه

فشربته وبعدين هو عمل نفس إلي عملته

وبعدين كل واحد شرب إلي فضل في الكاس

وجم المعازيم يسلموا علينا

وخطيبي يعرفني على كل واحد او واحده تسلم عليا

وانا كمان كنت بعرفه باقاربي إلي بيسلموا عليه

لحد ما ايدي ورمت من التسليم

لكن الحمد لله الشباب اصحابه كانوا من بعيد يقولوا لي: مبرووووووووك

خطيبي : تعرفي انا عايز ايه دلوقتي؟

انا : عايز تشرب؟

خطيبي : لأ ، عايز اخطفك واخدك لمكان مفيهوش حد غيرنا



انا : يا مجنون

خطيبي : انا مجنون بيكي يا عمري

وتأخر الوقت بينا حتى الساعة الواحده بالليل وبعدها قمنا وعلى النغمات الرومانسية وقف الشباب صفين واحنا مشينا بينهم وبعدين المصور قال : قولوا باي باي للكاميرا

وعملنا باااااااااااااااي

وركبنا العربيات والكل روح لبيته إلا العريس رجع معانا تاني

والعشا كان متحضر له

دخلنا البيت وبدأوا اخواتي بتحضير السفرة



وجلست انا وخطيبي شوية في الصالون

قمت اغير لبسي علشان مش هينفع افضل ماشية في البيت بالفستان

ورحت غيرت ولبست طقم شيك كنت محضراه



وبعدها راحوا يتعشوا وجابوا العشا لينا في الصالون انا وخطيبي

مقدرتش اكل غير لما قال خطيبي : علشان خاطري تاكلي ، لو مكلتيش مش هاكل

طبعا حاولت اكل حاجات بسيطة

بس هو منسينيش كان كل شويه يديني في الشوكة لحمه ويقول : يارب لو ما أكلتي اموت

انا : بعد الشر عليك

وخلصنا عشا وقام خطيبي بعدها روح

ولكن قبل ما يمشي قال لبابا : يا عمي ممكن اخد خطيبتي معايا

ضحكنا كلنا ورد بابا عليه وقال : يا سيدي متستعجلش بكره تبقى ليك لوحدك لحد ما تزهق منها

خطيبي : انا عمري ما هزهق من حبيبتي ابدا

وبعدين مشي وانا كنت ميته من التعب

بس كنت فرحانه جدا ومش جايلي نوم

ولأول مرة قلت ارن على خطيبي

رنيت عليه مفيش ثواني كان بيرن عليا

وبعدها بعت لي رسالة

" إن نمت أحلم فيك
وإن سرحت أفكر فيك
وإن زعلت حنيت أبيك
بصراحة أموت فيك"

استمرينا على كده لحد الفجر ارن عليه وهو يرن عليا

الظاهر محدش فينا جاله نوم الليله دي

ومرت الايام وكان لازم ..........

يا ترى لازم ايه؟؟؟؟؟؟؟؟

كفاية كده النهاردة
إقرأ المزيد Résuméabuiyad