السلام عليكم ورحمة الله وبركاته

اسعد الله يومكم بكل خير

مع الجزء الـ 12

قبل معاد الفرح بـ 5 أيام كان لازم نوزع كروت الفرح

واخترت الكارت ده



وبعدين نروح نودي العفش في شقتي

تقاليد البلد عندنا بتقول " لو شقة العروسة هيكون في نفس مكان شقة العريس يبقى العروسه متروحش تفرش العفش اما لو كان شقة العروسه في مكان وشقة العريس في مكان يبقى تروح عادي بيتها وتفرشه "

احنا بقى في البيت مش عندنا الكلام ده

لأني مش معقول هتجوز ومش عارفة حاجتي فين

يعني اقوم الصبح ادور على مكان السكر ياترى محطوط فين ؟؟؟

لأ طبعا ، دي كلها تقاليد احنا في البيت مش موافقين عليها

فطبعا روحت شقتي الجديدة انا واخواتي وماما وبابا واخويا وصديقتي نور

علشان نفرش العفش

اول حاجة عملناها انه بابا جاب عربية كبيرة وحط فيها كل حاجتي علشان ننقلها لبيتي الجديد

في ناس بتعرض فرش العروسة على العربية يعني يفرشوا مفرش السرير على العربية والبطاطين واكتر الحاجات

لكن احنا برضوا مش بنعمل كده لأن كل الحاجات دي ممكن تبقى مش نظيفة على ما توصل البيت

وضعنا كل شئ في العربية وروحنا كلنا على بيتي الجديد

وصلنا البيت وكان في استقبلنا زوجي حبيبي

بدأوا الرجاله ينزلوا العفش واحنا الستات روحنا عند حماتي قعدنا لحد ما خلصوا تنزيل

وتركيب الخشب ( اوضة النوم والسفرة والنيش )

بعدها بدأنا احنا الستات في فرش الشقة

اول حاجة عملناها هي مسح الشقة كلها والحمد لله انها سيراميك يعني سهله في التنظيف



بعد ما الارض نشفت كل مجموعة مسكت جزء من الشقة وبدأت تفرشه

اختى فوفو ولولو دخلوا المطبخ وبدئوا يفرشوا الحاجات



اختى ام مريم ومرات اخى بدئوا يرصوا الحاجات في النيش



نور صديقتي وماما دخلوا اوضة النوم وقعدوا يرصوا في الهدوم بتاعتي وحاجاتي كلها



طبعا هتقولوا انا فين؟

انا بقى المشرفة على كل ده

بس علشان اعرف مكان كل حاجة

اما بابا واخويا وزوجي بعد ما الرجاله حطوا الانتريه راحوا قاعدين عليه بس انا مش كنت موافقه على كده


انا : لا لا لالا ، محدش يقعد على العفش بتاعي

اخويا : يعني نقعد فين ، حرام عليكي سيبينا نستريح شويه

انا : طيب ، بس متريحوش عليه قوي

بابا : يا بنتي هو انتي جايبه العفش ومش هتقعدي حد عليه

انا : مليش دعوة وخلاص ، خدوا بالكوا وانتم قاعدين

طبعا حماتي وبنتها تحت في شقتهم بيعملوا الغدا لأنهم المفروض يطلعوا الغدا او ننزل تحت عندهم نتغدى

وانا افضل ننزل تحت علشان عفشي حبيبي ميحصلوش حاجة


ماما نادت عليا وخلتني اكوي حاجاتي

قعدت اكوي قمصان النوم ، والبيجامات إلي محتاجه كوي ، ولبسي الخروج



وانا بكوي زوجي قاعد مع بابا واخويا بس عينه على اللبس إلي بكويه

وكل شويه يشور لي علشان اوريله انا بكوي ايه

وانا اقوله لأ

كل شوي يجي لحد عندي بحجه انه يسالني مش عايزة حاجة ويروح باصص على القمصان النوم

ويقول : ايه الحاجات الحلوة دي

وانا اروح بسرعة شايله الهدوم من قدامه

واقول له : امشي بقى خليني اعرف اكوي ، ولو عايزة حاجة هقولك

قبل العصر بحاجة بسيطة نادت حماتي علينا كلنا وقالت ننزل نتغدى

نزلنا كلنا طبعا لأننا كنا منهكين جدا من كتر الشغل

خلصنا اكل وشربوا الشاي لأني مش بشرب شاي وبعدين طلعنا تاني نكمل باقي الحاجات

فضلنا على ترتيب الشقة لحد الساعة 12 بالليل

والله يكرمها حماتي عملت بردوا العشا ونزلنا ناكل

روحنا بعدها على البيت بس كان فاضل حاجات بسيطة جدا والشقة تكون تمام

تاني يوم روحت انا واختى فوفو الشقة لوحدنا وضبطنا الحاجات الناقصه وبعدين طلعت على الكوافيره عملت ماسكات وبعدين روحت ادور على فستان فرح

روحنا اكتر من محل وفي الآخر رسينا على محل لسه فاتح جديد وحاجته جميلة

اخترت الفستان ده



والجوانتي ده



والأكسسوارات دي



والبوكيه ده



كل ده بيكون مع حساب الفستان

وبعدين روحت اشتري حذاء مناسب للفستان

واخترت ده



وبعدين روحت على المغرب تقريباً

والحمد لله

كانت ماما وقتها هي واخواتي بيحضروا الاكل لبكره علشان الحنة

كانت بتصبع الكفته

ودي مشهورة قوي في الأفراح

قعدت اعمل معاهم شويه

وبعد ما خلصنا قعدت اخد نصايح من ماما

وبعدين اختي ام مريم قعدت تديني في شوية نصائح

وبعدين روحت انام من تعبي طول النهار

وجاء يوم الحنة ( قبل الزفاف بيوم )


كفاية كده النهاردة

وأنتظروا يوم حنتي في الجزء القادم ان شاء الله
إقرأ المزيد Résuméabuiyad