لماذا تصرخون على من يموت

والله ارتاح من الهموم

هموم الدنيا ما بتخلص

لكن بالموت كل الهموم بتزول
إقرأ المزيد Résuméabuiyad


إلهي من سواك ارجوه

من سواك يزيل احزاني

من سواك يحقق مرادي
إقرأ المزيد Résuméabuiyad

هذه قصتي الخيالية لحلمي الوردي

حلقات متتالية ارسم فيها أحلامي

ولكنها ليست أحلام عادية إنما هي أحلام وردية

ان شاء الله تعجبكم

وعلى فكرة زي ما قلت دي مجرد احلام وليست حقيقة

كل القصة من تأليفي


( اول الكلام )

كعادتي ذهبت للمدرسة بحكم اني مدرسة فبعد ان انتهى الطابور ذهبت للطالبات في الملعب

وجدت احد الزملاء من المدرسين يستأذن مني

فدار بيننا هذا الحوار

المدرس : السلام عليكم

انا : وعليكم السلام ورحمة الله وبركاته

المدرس : حضرتك فاضيه شويه

انا : خير يا استاذ ....

المدرس : خير ان شاء الله بس كنت عايزك بعد ما تخلصي حصتك

انا : خلاص ان شاء الله اخلص واجيلك

وانتهى الحوار بيننا وانا في حيرة شديدة ماذا يريد مني

اكيد محتاج يروح وعايزني اخد الفصل بتاعه

المهم خلصت الحصة وانا اقول يارب استر

روحت له فوجدته يبتسم

فقلت له : خير يا استاذ .....

فقال لي : خير ان شاء الله انتي مخضوضه كده ليه

فقلت له : ولا مخضوضه ولا حاجة بس حاسة انك عايز تروح وعايزني اخد الفصل بتاعك

فضحك وقال : لا والله الحكاية ابسط من كده خالص

فقلت له : طيب اتفضل

فقال لي : عايز اكلمك في موضوع مش عارف ابدأ منين

فقلت له : اتفضل يا استاذ ... انا سمعاك

فقال لي : انا الصراحة معجب بأخلاقك وطريقة تعاملك مع الجميع وشخصيتك الجميلة

فاحمر وجهي

وقلت في سري ( ايه الكلام ده انا مش متعوده ان حد يقول كده ،انا هقول له بس يا استاذ ... انا عندي حصة ،المهم امشي من قدامه )

فاكمل وقال : انا عايز اخطبك

وسكت واستنى رد فعلي

وانا غرقت في شبر ميه ونزلت عليا الكلمة كالصاعقة

" يا فرحتي يا فرحتي عريس يا ماي ياحلاوة يا ولاد "

وسكت انا كمان وماقولتش ولا كلمة وكنت عايزة اي طالبه تنادي عليا او ان اي احد ينادي عليه

فقطع الصمت وقال : انا عارف ان المفروض اكلم والدك ولكن حبيت اعرف رايك الاول

فنظرت له ولم اتكلم ( مش عارفة الكلام راح فين بس كنت فرحانه جدا لأنه شاب محترم )

فقال لي : انتي موافقه مبدئيا على الموضوع ؟

فهزيت راسي وبإبتسامه خجوله قلت : انا مش عارفة اقول ايه بس انا لازم اشاور اهلى في الموضوع الاول

فابتسم وقال : وده إللي انا عايزه وانا مستني ردك بفارغ الصبر

فسكتنا مرة ثانية

ولكن المرة دي قطعت الصمت وقلت : بعد إذنك اروح لحصتي

فقال لي : اتفضلي واسف إذا كنت عطلتك

فقلت له : لا مفيش مشكلة ، بعد إذنك

قال : اتفضلي

روحت بعدها لحجرة المدرسات ولم اصدق نفسي ان حلمي قريبا سيتحقق وانه حان الوقت وجاء من يخطبني

انتهي اليوم الدراسي

وذهبت للمنزل ففتحت لي والدتي

فقابلتها بإبتسامه عريضة جدا جدا

فاستغربت وقالت : خير بتضحكي على ايه

فقلت لها : لا مفيش حاجة

الصراحة قلت اعمل استخارة الاول وبعدها احكي لوالدي وامي واخواتي الموضوع

فعلا صليت صلاة الاستخارة وبعدها توجهت للعائلة وبدأت احكي لهم الموضوع

واثناء حديثي

امي تتمت وتقول : الحمد لله يارب ربنا يوفقك

وبعد ان انتهيت بابا سألني

بابا : وانتي ايه رايك بالموضوع؟

احمر وجهي مرة أخرى

فردت ماما : ما شاء الله دا كويس جدا

فقال بابا لها : اريد رايها هي بتشوفه بالمدرسة كتير ، ايه رايك؟

فقلت : هو ما شاء الله يا بابا انسان كويس جدا وكل المدرسة بتشكر فيه بس .. " وسكت "

فقال بابا : بس ايه ؟

قلت : مش عارفة

فقالت ماما : اعملي استخارة يا بنتي وان شاء الله لو خير ربنا ييسره لكي ولو شر ربنا هيبعده عنك

فقلت لهم : انا عملت استخارة وربنا ييسر الامور

جلست طوال اليوم اتكلم مع اخواتي عنه رغم انني لم اكن اتكلم معه اطلاقا ولكن كان كل كلامي عن الحديث الذي دار بيننا

كنت في حيرة ماذا افعل لو سالني ما رايك وانا لم اتخذ القرار بعد

وجاء اليوم الثاني ومر بسلام دون ان نتكلم اطلاقا

فمر اسبوع كاملا ولم ارد عليه

وهو كان يكتفي بإلقاء السلام علي إذا مر من امامي

وما اكثر المرات التي كان يمر علي

المهم احسست بإرتياح يوما بعد يوم

وقلت لبابا : عايزة ارد على الاستاذ ... الحكاية طولت قوي

فابتسم وقال : يعني خلاص قررتي

قلت : ان شاء الله ، ولكن اقول له إيه بالتحديد

فقال لي : قولي له بابا عايز يشوفك ومستنيك يوم الخميس الساعة 8 مساء

فقلت له : خلاص ان شاء الله هكلمه بكره

وإلى اللقاء في الجزء الثاني

( زيارة العريس )
إقرأ المزيد Résuméabuiyad

الجزء الثاني
( الرد عليه وزيارته لنا )

لم انم طوال الليل من التفكير وانا احاول ان اكرر كلام بابا " بابا مستنيك يوم الخميس الساعة 8 "

بعد صراع مع النوم تغلبت عليه ونمت واستيقظت على صوت المنبه



ذهبت للمدرسة

ومش عارفه اقوله ايه

فكرت كتير هل اقول له ام انتظر ليوم تاني


الصراحة لم استطع واول ما شوفته سبقني وقال لي : صباح الخير

قلت له : صباح الخير

فروحت قلت له : استاذ .. وسكت

قال لي: نعم

فقلت في سري انا هقول اي حاجة وخلاص

قلت : الطابور بدأ ولا لسه



فاستغرب وقال : اكيد بدا

فتشجعت وقلت لازم اقول له دا بابا محملني امانه ولازم اقولها

بتحجج باي حاجة قال يعني انا مش عايزة اقوله رايي انا كمان

قلت له : بابا مستنيك يوم الخميس الساعة 8

فابتسم واحمرت ودانه وقال : بجد

فقلت له: آه والله

قال : انا مش مصدق اخيرا

فقلت له : اخيرا ايه

قال : كنت منتظر ردك بفارغ الصبر

ان شاء الله هاجي لوحدي الاول علشان اكلم باباكي عن امكانياتي وكل شئ عني
وبعدها ان شاء الله الاسرة هتيجي معي واحقق حلمي

فاستغربت من كلمة " احقق حلمي"

فقلت من احراجي : بعد اذنك

فقال لي : لا إله إلا الله

ابتسمت وقلت : محمد رسول الله

مرت الايام سريعا وانا احاول ان احافظ على بشرتي من الشمس

وما ادراكوا ما شمس الصيف بمصر



فأخذت اجازة يوم الخميس للإستعداد

وجاء يوم الخميس بسرعة البرق

وطبعا اشترينا الجاتوه والبيبسي





وبدأت انا من بعد الظهر في وضع الماسكات

حاولت اجرب كل شئ سمعت عنه من ماسكات

بس استقريت على ماسك الزبادي بالعسل

بعدها قمت بالبحث عن الطقم إللي هلبسه

فقمت بقلب الدولاب راسا على عقب لأختار ما سارتديه

واستقر الرأي على الطقم ده



حبيت يكون حاجة بسيطة وغير متكلف

وسريعا الساعة 7 ونص

لقيت باب المنزل بيرن


وقفت في مكاني بإنتظار صوت بابا يقول " اهلا وسهلا اتفضل"

ولكن الحمد لله طلع ناس بيسألوا عن منزل جارنا

فحمدت ربنا وقمت بلبس الطقم وعمل مكياج خفيف جدا

وقاموا اخواتي بتحضير اطباق الجاتوه والكاسات





وانا حائرة بين المطبخ للإطمئنان على حاجات التقديم وبين المرآه التي اصبحت صديقتي هذه الفترة



دقت الساعة 8

وكانه كان واقفا على الباب

فسمعت جرس الباب بيرن

يعجبني قوي الراجل الملتزم بمواعيده

فجريت و من ورا الستارة نظرت للباب وبابا فتح له ووجدته يرتدي طقم اول مرة اشوفه عليه

بصراحة بيعجبني فيه شياكته قوي

وكان معاه كيس فيه حاجة اكيد علبة شيكولاته


فدخله بابا في الصالون وبدأ يرحب به

وبعد فترة جه بابا وقال : فين البيبسي والجاتوه

ثم نظر إلي وقال : يلا تعالى معايا علشان تطلعي له

فتبسمت وذهبت ورا بابا

واخواتي يقولون يا عم يا عم من قدك يلا روحي لعريسك

وماما بتدعي لي وتقول : ربنا ييسرك الحال ويجعله من نصيبك ان كان فيه خير


فدخلت الصالون وقلت : السلام عليكم

وانا مش بصاله

فقام وقال : وعليكم السلام ورحمة الله وبركاته

فجلست على كرسي امامه



وجاء اخى بالجاتوه والبيبسي

فعادة العروسة تدخل بالجاتوة اصبحت موضه قديمة عندنا

اعتقد انها انقرضت علشان المواقف إلى كانت بتحصل ان العروسة تقع وهي بتقدم الصنيه والحاجات الغريبة إلي كانت بتحصل

فالحمد لله اتلغت هذه العادة


بابا قال : اتفضل يا استاذ .... ( بابا يشير إلى الجاتوه والبيبسي)

ثم وجه بابا الكلام لي

وقال : مش تقدمي للأستاذ ... الضيافه

فتبسمت بخجل وقمت بإعطاءه البيبسي ونسيت اعطيه الجاتوه

فقال : والجاتوه مش ليا ولا إيه

فضحكنا وقمت بإعطاءه الجاتوه

فقام بوضعه على الطقطوقه التي بجانبه وشرب مرة واحده من البيبسي



وبعدين قال :

انا يا عمي جاي اخطب الآنسة ... وحابب اعرفك علي اكتر انا مدرس رياضيات ابن فلان الفلاني ومرتبي كذا وعندي شقة بناها لي ابي الله يرحمه ولي اخت واحده متزوجة وامي الله يخليها لي

فقال بابا : تشرفنا بمعرفتك وربنا يقدم إلي فيه الخير احنا ما يهمنا اي شئ غير انك تسعد بنتنا وتحافظ عليها

ثم بدأ بابا يعرفه بنفسه وعن وظيفته وعن عدد اخواتي

ثم قال والدي له : لو عايز تسأل العروسة عن اي شئ اتفضل

فابتسم وقال : لو هي عايزة تسألني عن اي حاجة تتفضل

فنظرت له نظرة سريعة ولم انطق بكلمة " لم اتوقع ان يقول هذا "

فقال هو : نسيت اني اقول انا عمري 28 سنة

فكنت انظر إليه وهو يتكلم وفجأة نظر إلي فاتحرجت ونزلت نظري لسجادتنا اللي حفظت شكلها من اول ما قعدت

فقام بابا فتح حديث عن الرياضة

وما ادراكوا ما الرياضة في منزلنا والرجاله بيحبوا يتكلموا في الرياضة كأنها مقرر ولازم يراجعوه

المهم الحديث طول عن الرياضة وانا لا افقه شئ فيها

ولكن طبعا اثناء حديثه كان من فترة إلى أخرى ينظر إلي وانا كمان كنت انظر إليه ولكن على فترات متباعده

الموقف محرج جدا بابا واخي لاحظوا انه ينظر إلي وهو يتكلم


فقال بابا ممازحا : نخرج بره علشان تتكلموا براحتكم

فضحك الجميع وانا ابتسمت ابتسامه خفيفة لأني لو فتحت في الضحك مش هخلص

وبعدها عم المكان فترة من السكون ثم أذن المؤذن لصلاة العشاء

فرددنا وراء المؤذن وبعدها استأذن


وقال : استأذن انا يا عمي

فقال بابا : تشرفنا بمعرفتك يا ابني وربنا يقدم إلي فيه الخير

فسلم على بابا وقال : بإنتظار ردكم ان شاء الله

ونظر إلي وقال بهمس : لا إله إلا الله

قلت له : محمد رسول الله

فوصله بابا واخويا إلى باب البيت

وبعد ان خرج دخلت بسرعة لغرفتي واخواتي يسألوني عشرة اسئلة في وقت واحد

وانا لا استطيع الرد على ولا سؤال

المهم حكيت لهم كل حاجة

وفتحت الكيس وجدته علبة شيكولاته تمنيت ان اتركها كما هي فهي تعتبر اول حاجة جابها لي




لكن مقدرتش اقاوم وفتحتها وبدات اوزع عليهم الشيكولاته كأني أنا إلي شرياها

المهم

جاء السؤال الذي لم اتوقعه


كان السؤال من ماما : انتي إيه رأيك فيه ؟

نظرت لها وانا اخاف من المستقبل فانا لا اعرفه جيدا ولكنه انسان خلوق وطيب والكل يشهد له بذلك

فقلت لماما : مش عارفة انا هعمل استخارة كمان مرة وربنا يسهل

اصبحت متوترة جدا هذه الفترة

ودار في عقلي اسئلة كثيرة

هل هذا هو الشخص الذي سأعيش معه طوال حياتي؟

هل سيسعدني ام لا؟

هل هو كما يقولون الناس ام كلها مظاهر ؟

الرجاله بيتغيروا بعد الزواج فهل هو سيتغير إلى الأحسن أم إلى الاسوء؟

من شدة توتري اصبح عندي ارق فكنت لا انام وظهر على وجهي اثر السهر وقلة النوم


ولا اعرف ما القرار الصحيح وكلما اشتدت حيرتي كنت اسال بابا ايه رايك فيه ؟

فيرد عليا : هو انسان كويس بس لازم نسأل عليه الاول قبل ما نقول اي قرار

فدعوت الله ان ربنا يوفقني لما فيه الخير

مر اسبوع على هذا الحال

وبابا مازال يسأل عنه

فقد سأل بعض جيرانه وقالوا له انه رجل ملتزم ومؤدب

فجاء بابا واخبرني انه موافق عليه


ثم قال لي : توكلي على الله واستخيري الله وإلي تشوفيه راح نعمله

والرأي رأيك الآن

فزاد توتري فانا الآن من ستحدد مستقبلها هل اوافق عليه ام لا ؟؟

وبعد يومين اردت ان اخبرهم رأيي

فذهب لبابا وماما واخواتي وقلت لهم :

انا موافقه عليه ولكن ...

وإلى اللقاء في الجزء الثالث ( اللقاء الثاني )
إقرأ المزيد Résuméabuiyad


وإليكم الجزء الثالث ( اللقاء الثاني )


وبعد يومين اردت ان اخبرهم رايي

فذهبت لبابا وماما واخواتي وقلت لهم :

انا موافقه بس عايزة اتكلم معاه اكتر انا لسه معرفش طباعه ايه طريقة تفكيره كل ده عايزة اعرفه

فابتسم الجميع

وقالت ( اختى الكبيرة ) : هو حد قال لك انك هتتجوزي بكره

يا بنتي المهم انك موافقه عليه في الاول وبعدها هتتعرفوا على بعض براحتكوا

بابا : يعني اتصل بيه واحدد معاه معاد يجي ويجيب والدته واخته ماشي؟

انا: ماشي وربنا يستر من امه

ردت ( اختى الكبيرة التانية ) : وإيه إلي يخوفك من امه ؟

انا : انا خايفة تطلع امه من الحموات الصعبين بتوع زمان وتخليني اكسر البندق بسناني وتفحصني وتشد شعري والحاجات إلي بشوفها في الافلام دي

فضحكنا جميعا

وقالت ماما :
انتي وشطارتك ممكن تخليها تعاملك كويس وممكن تخليها تعاملك وحش

انا : هتتصل امتى يا بابا؟

فقالت ( اختى الكبيرة الثالثة ) : مستعجلة على ايه يا بنتي اصبري شويه هو هيطير

بابا : ان شاء الله هتصل بيه النهاردة واقول له يجي بكره هو والجماعة

انا : بكره لالالالالالالالا انا مش هلحق اعمل حاجة

فضحك بابا وقال : هتعملي ايه دا والدته واخته هيجوا معاه يشوفوكوا بس

انا: بس هي بس دي مينفعش معلشي يا بابا خليها بعد بكره احسن

انا في حاجات كتير لازم اعملها

بابا: خلاص يا ستي خليها بعد بكره

ثم ذهبنا لتناول الغداء كنت سرحانه بفكر هعمل ايه والبس ايه

ماما : بدانا من اولها في السرحان يا بنتي كلي علشان حماتك لما تشوفك متقولش عليكي معصعصه ( رفيعه ) ..

فضحكت وقلت لها : والله إذا كان عاجبها

وبعد الغدا إلي ما أكلت منه غير ملعقتين مكرونه لأني كنت متوترة

راح ابي يتصل بيه فطبعا قعدت جنبه وهو بيتصل بيه

بابا : سلام عليكم

العريس : ....

بابا : ازيك يا استاذ ...

العريس : ....

بابا : ان شاء الله تشرفنا انت والوالده بعد بكره

العريس : ....

بابا : دا انتوا تنوروا

العريس : ...

بابا : ماشي يا حبيبي مع السلامه

العريس : ...

بابا : الله يسلمك

واخذت السماعة من يد ابي وقبل ان اضعها قلت لأبي : إيه قال لك ايه يا بابا؟؟؟

بابا : طيب حطي السماعة الاول

وضعتها بسرعة وكررت سؤالي : ايه يا بابا قالك ايه؟؟؟

بابا : هيكون قال ايه يعني هييجوا بعد بكره ان شاء الله

انا : طيب قال لك ايه وانت قلت له " تنوروا "

بابا : اه كان بيقول هيجيب اخته معاه

انا : مسألش عليا؟؟

بابا : ايوة يا ستي بيسلم عليكوا

انا : نعم عليكوا يعني مش بيسلم عليا لوحدي

ضحك ابي وقال : خلاص يا ستي بيسلم عليكي لوحدك

بطلي اسئلة بقى

فقالت ام مريم : يلا يا ستي بدل حماتك لوحدها هتيجي اخته كمان تعاين البضاعة

انا : بعنهم انا اصلا مش هطلع هههههههه

ثم قمت وذهبت للنت وبدأت أبحث عن ماسكات للبشرة وحاجات تحمر خدودي وحاجات من دي

المهم طلعت بشويه ماسكات

وبدأت اجهز نفسي للمقابلة

قبل المقابلة بيوم جاءت امي تنصحني

ماما : بصي بقى انا عايزاكِ تلفي شعرك علشان لما حماتك تيجي واخته تدخلوا في الصالة وترفعي الطرحة وتوريها شعرك

انا : نعم ايه ده متفقناش على كده شعر ايه يا ماما

لالالالالالالالا

هو انا قرعه وهي جايه تتأكد ولا ايه

والله لو قالت لي عايزة اشوف شعرك هقولها طبعا لا

ماما : يا بنتي بطلي عند افرضي قالت لك متيجي نقعد لوحدنا احنا الستات هتعملي ايه

انا : يا ماما انا لسه هفك الطرحة إلي بقعد اعملها في ربع ساعة وبعدين تشوف شعري وبعدين ارجع الفها تاني علشان اخرج للعريس ايه وجع الدماغ ده

اشمعنى انتي لما جينا نخطب لاخويا مخلتيش مراته توريكي شعرها

ماما : يا بنتي مش كل الناس زي بعضها على العموم اعملي حسابك لحاجة زي دي وخلاص

انا : طيب ان شاء الله

وقفت امام الرآه اعمل شوية تسريحات لحد ما اتهبلت وفي الاخر قلت هعمل اي حاجة وخلاص

نمت بدري بس طبعا مجليش نوم بسرعة

قعدت افكر في الكلام إلي ممكن حماتي تسأله ليا او ايه الكلام إلى ممكن اقوله

لحد ما نمت وصحيت طبعا على الصوت المزعج بتاع المنبه

رحت المدرسة ولكني لم اجده في الطابور

فانا تعودت على رؤيته في الطابور بجوار الصف الثالث

فاستغربت جدا هو فين يبقى اكيد غير رايه وقال بلاش احرجها واغيب وهي اكيد هتفهم الحكاية

مكملتش كلام مع نفسي إلا ووجدت من يقول من خلفي : صباح الخير

الصوت ده مش غريب عليا

استدرت فوجدته فقلت له : صباح الخير

قال : ازيك

انا : الحمد لله

قال : ان شاء الله هاجي انا وامي واختي النهاردة

انا : تشرفوا وتنوروا

جاءت طالبة وقالت لي : يا ميس، ميس نور عايزاكي

مس نور دي اكبر مني بسنتين مخطوبة

انا : حاضر قولي لها انا جايه

قال : طيب معطلكيش

انا : اوكي بعد إذنك

قال : اتفضلي

رحت لنور والابتسامة على وجهي

نور : ايه الحكاية؟

انا : حكاية ايه؟

نور : مش عليا يا ماما يلا قولي كان بيقولك ايه؟

انا : هو مين ؟

نور : يا بت بطلي قولي بقى هو في ايه ؟

فابتسمت وقلت لها : مفيش حاجة انتي على طول كده عايزة تعرفي كل حاجة

نور: طيب اقول انا بقى

انا : تقولي ايه؟

نور : الاستاذ معجب بيكي وشكلها كده في مشروع خطوبة صح ولا لأ

فاستغربت وقلت لها : انتي عرفتي منين

نور : يا بنتي دا كان وانتي في الرايحة والجاية يبصلك لو أتأخرتي يسال عليكي

انا في الاول بحسبه بيسال عليكي علشان الفصل بتاعك لكن سؤاله المتكرر عليكي خلاني اقول في حاجة

انا : كل ده كان بيحصل والله ما كنت واخده بالي

يا لئيمة خدتي بالك من كل ده ومش تقولي طيب نبهيني

نور : انا قلت خليكي على طبيعتك احسن لحد ما يبدأ هو ويفاتحك بالموضوع

انا : هو فعلا كلمني وجه عندنا البيت والحمد لله بابا سال عليه والنهارده هييجوا هو ومامته واخته

نور : بجد يلا يا عم هتتخطبي ونبقى زي بعض ومفيش حد احسن من حد

انا : قولي ان شاء الله دا انا شايله هم النهاردة وزيارة امه

نور : يا بنتي مدام هو مقتنع بيكي وعايزك خلاص محدش يقدر يأثر عليه

انا : ريحتيني الله يريحك

نور : ابقي طمنيني عملتي ايه ماشي؟

انا : ماشي بس ادعيلي

وبعد انتهاء اليوم الدراسي ذهبت للمنزل غيرت ملابسي وكان الغدا متحضر

بس انا مكنش ليا نفس خالص

حاولت اكل بس مقدرتش رحت نمت شويه علشان اريح اعصابي لأني حسيت بتوتر

وبعدها قمت حضرت طقم جميل يزغلل عين حماتي المستقبليه

وطبعا بابا اشترى دسته جاتوه وبيبسي

وجاء موعد المقابلة

ترررررن

بابا : اهلا وسهلا اتفضلوا

جاءت حماتي واخته وهو ودخلوا الصالون

وبعد فتره دخل ابي وقال لي : يلا علشان تسلمي على الضيوف

فدخلت وقلت : السلام عليكم

فقالوا : وعليكم السلام

فسمعت حماتي تقول : ما شاء الله اهلا وسهلا ازيك يا حبيبتي

فسلمت عليها وبوستها واثناء ما بسلم عليها حضنتني

قلت في سري هتعمل زي ماري منيب في الفلم ربنا يستر

المهم سلمت على اخته ما شاء الله عسوله وعندها بنوته زي القمر اسمها سلمى

جلست بجوار حماتي لأنها قالت : تعالى يا حبيبتي اقعدي جنبي

وبدا الحديث مع حماتي فقالت لي : انتي بتشتغلي مع ... في المدرسة

انا : ايوة بس انا مدرسة تربية رياضية

تكلمت كثيرا مع حماتي واكتشفت انها انسانة طيبة جدا وبتحب ابنها قوي ( زوجى مستقبلا )

انتهت الجلسه على انهم سيأتون يوم الجمعة وسيأتي معهم خال .. ( العريس )

للإتفاق على كل شئ

وهنا بدأت امي تفكر في الجهاز وايه المفروض إلي يجي وايه ناقص عندي

والحمد لله ابي وامي مجهزني انا واخواتي ولكن في حاجات ناقصة

ماما : امتى هننزل نشترى جهازك ؟

قلت لها بقلق : مش دلوقتي يا ماما لما يجوا يتفقوا مع بابا الاول وبعدها نشوف ايه ناقصني

وجاء يوم الاتفاق

إلى اللقاء الجزء الرابع ( يوم الاتفاق )
إقرأ المزيد Résuméabuiyad
السلام عليكم ورحمة الله وبركاته

الجزء الرابع ( يوم الاتفاق )

حضرت نفسي لتالت مرة

وطبعا طقم تالت



لازم طبعا ولا يقول مش عندي غير طقمين وبكرر فيهم

المهم ضبطت نفسي وجاء موعدهم

تررررررررررررن

بابا : اهلا وسهلا تفضلوا

العريس : ازيك يا عمي

واشار إلى خاله وقال : خالي يا عمي

بابا : اهلا وسهلا اتفضل

جاء خاله وامه وهو معاهم طبعا ولم تأتي اخته لأن ابنتها سلمى كانت تعبانه شويه ده عرفته بعدين

فدخلت سلمت عليهم وجلست

قعد خاله يشكر في ابن اخته ( العريس )

وبعدين اتحول علي وبدأ يشكر فيا وان كلام العريس عليا طلع صحيح اني على خلق ومؤدبة والكلام ده

ثم قال خال العريس : يا استاذ .. ( بابا يعني ) عايزين نتفق على كل شئ

فقال ابي : تفضل احنا بنشترى راجل

فنظر ابي لي نظره فهمت منها اني اقوم واطلع بره

فقمت على الفور وقلت : بعد إذنكم

فقال خال العريس : اتفضلي يا بنتي

فوجدت امي تقول لي : انا هنادي على حماتك اخليها تقعد في الصاله ونقعد معاها انا وانتي ماشي ؟

انا : ليه يا ماما خليها قاعده معاهم وخلاص

ماما : يا بنتي ما يصحش تقعد وسط الرجاله اكيد محروجة

انا : طيب وبعدين لما تقعد في الصالة هنعمل ايه؟

ماما : هتعملي ايه ؟ هو مش انا قلت لك حضري نفسك علشان تشوف شعرك

انا : ايوة يا ماما بس افرضي هي مش عايزة تشوف شعري

ماما : يا بنتي هو انتي هتقولي لها شوفي شعري

انتي هتروحي دلوقتي تعملي تسريحة بسرعة وانا هنادي عليها تدخل الصالة وبعدين لما تخلصي تدخلي تقعدي معانا ، يلا متتأخريش واعملي تسريحة حلوة كده

وبلاش الكحكه بتاعتك دي خليها تشوف شعرك الطويل

انا : طيب يا ماما وهديها مسطره تقيسه كمان

فضحكت وضحكت ماما وقالت : يلا بقى بطلي رغي

المهم روحت اعمل تسريحة وطبعا كل البروفات السابقة مش راضيه تتضبط معايا

المهم آخر ما زهقت عملت تسريحة قصة ذيل الحصان علشان ماما تفرح بيا

اثناء ما بعمل القصة نادت ماما على حماتي ودخلوا الصالة

بعد ما خلصت رحت الصالة

انا : السلام عليكم

حماتي وماما : وعليكم السلام ورحمة الله وبركاته

حماتي: بسم الله ما شاء الله ايه القمر ده

انا : ربنا يخليكي يا طنط دا من ذوق حضرتك

وقعدت حماتي تبص لي وتبص لشعري وساعات وهي بتكلمني تحط اديها على شعري

اعتقد انها شكت في حاجة

حماتي : انتي بقى بتعملي سيشوار عند مين؟

ماما اسرعت بالرد: سيشوار ايه دا طبيعي انا بناتي مش بيروحوا للكوافيرة خالص

حماتي: ما شاء الله ، الله يحميها

انا : ميرسي يا طنط

اثناء قعدتنا في الصاله كان الاتفاق يدور بين خاله وبابا

وبدا الاتفاق كالتالي

خال العريس : ابننا عنده الشقة غرفتين وصاله ولسه هيوضبها واحنا هنشيل غرفة النوم



والسفرة ( السفرة تشمل النيش )


والانتريه


بابا : واحنا علينا المطبخ


والسجاجيد



والاجهزة الكهربائية

( تشمل : الثلاجة / البوتاجاز / الغساله / المكنسه ...)

طيب والستاير؟

خاله : احنا كده شلنا كتير

العريس : خلاص يا عمي الستاير علينا

بابا : اتفقنا

وبالنسبة للشبكة انا مش هتكلم فيها لأنها هدية من العريس لعروسته وهو بيقيمها بيها

العريس : وداد غاليه عندي ودهب الدنيا مش يكفيها

بابا : ربنا يكرمك يا بني ويسعدكم

فقام بابا وجاء لينادي علينا لقراءة الفاتحة

فقامت امى بتقبيلي وحماتي

وبابا واقف بيقول : خلاص بقى سيبوها تقرا الفاتحة الاول وبعدين اعملوا إلي انتوا عايزينه

فدخلت الصالون فقام ... ( العريس ) مبتسما فقلت : السلام عليكم

فقالوا : وعليكم السلام

ثم جلست

بابا : يا وداد ويا حاجه ( حماتي ) اتفقنا على كذا وكذا يلا نقرا الفاتحة كربط كلام على ما اتفقنا عليه

فقرأنا الفاتحة واثناء قرأتي نظرت إليه وجدته هو كمان ينظر إلي فتبسمنا وظللنا هكذا حتى انتهينا من القراءة

فقام ॥ (العريس) وسلم على بابا واخويا وقبل يد امه وسلم بابا عليه وعلى خاله

وتعالت الزغاريد من ماما ووالدته واخواتي من الخارج

ثم قال لي .. ( العريس ) : مبروك يا وداد

انا : الله يبارك فيك

فقام خاله من مكانه وقال : تعالى اقعد قريب من عروستك

فجلس بجانبي وكنت في غاية الكسوف

ولا كلمة راضيه تطلع مني محروجة جدا بابا واخى موجودين وانا اتكلم مع رجل آخر لالالالا مش معقول

ماما وحماتي قعدوا يتكلموا مع بعض

وبابا وخاله واخى بيتكلموا في موضوع تاني

وانا وعريسي بنتكلم في موضوع تالت

فبدأ هو بالكلام معي بصوت منخفض

العريس : انا مش مصدق اننا قرأنا الفاتحة

انا : وانا كمان

العريس : ان شاء الله هخليكي اسعد واحده في الدنيا وربنا يقدرني اجيبلك كل إلي نفسك فيه

تعرفي كان نفسي يكون ده كتب الكتاب

فابتسمت وقلت له : على طول كده

فقطع كلامنا خاله

خاله : ان شاء الله عايزين نحدد معاد علشان نشتري الدبل

بابا : عندك العريس والعروسة هما يتفقوا على اليوم إلى يناسبهم ويقولوا عليه

فنظر إلي ( العريس ) وقال : ايه رايك نخليها بكره نشتري الدبل ونلبسها

هزيت راسي وقلت : مفيش مانع

بابا : على خيرة الله

يبقى بكره ان شاء الله تشرفوا عندنا

خاله : ان شاء الله وربنا يتمم بخير

العريس : ممكن بقى اخد نمرة موبايلك ؟

انا : طبعا

فقمت بإعطاءه نمرتي وسجلها

العريس : رنيت عليكي دلوقتي ابقي سجليها عندك

انا : اكيد هسجلها

خاله : نستأذن احنا بقى ونشوفكم بكره علشان نشتري الدبل

بابا : ان شاء الله

فقمنا جميعا وقال لي ( العريس ) : هتوحشيني

احمر وجهي وابتسمت ولم انطق بكلمه

انتظر يسمع مني شيئا فلم اتكلم

فلاحظ الجميع خجلي وقال خاله: سيبها بقى بكره هتشوفوا بعض

فأنصرفوا جميعا

وبمجرد وصولي لغرفتي وجدت ....

ماذا تتوقعوا ؟؟؟

وإلى اللقاء في الجزء الخامس ( دبلة الخطوبة )

إقرأ المزيد Résuméabuiyad
السلام عليكم ورحمة الله وبركاته

نكمل معا الجزء الخامس

( يا دبله الخطوبه عقبلنا كلنا )

بمجرد وصولي لغرفتي وجدت موبايلي بيرن ولقيت نمره غريبة



بسرعة رديت


انا : السلام عليكم

المجهول : وعليكم السلام

انا : مين معايا ؟

المجهول : انا .. ( العريس ) انتي نسيتي تسجلي رقمي

فضحكت وقلت : انا اسفة والله نسيت اسجلها

العريس: ياريت تنسي على طول علشان اسمع الصوت جميل ده دايما

فسكت واكيد وشي احمر

العريس : اشوفك بكره ان شاء الله

انا : ان شاء الله

العريس: لا إله إلا الله

انا : محمد رسول الله

ومقفلتش الخط لقيته بيقول : انا مش هقفل غير لما تقفلي

انا : خلاص نقفل سوا

العريس: ماشي

واغلقنا الخط معا

وفوجئت بأخواتي حولي ووجدتهم يضحكون


ام مريم : انتي وشك محمر كده ليه؟ كنتي بتكلمي مين ؟

انا : كنت بكلم ، لأ مش هقول

لولو : عرفت يبقى كنتي بتكلمي العريس . صح؟

انا : ايوة واسكتوا بقى علشان بتكسف

فوفو : وش كسوف قوي

انا : طبعا يا حبيبتي انتي مش شايفه وشي محمر إزاي

ام مريم : كان بيقولك ايه؟

انا : لا دي اسرار

سيبوني بقى علشان بكرة هنروح نشتري الدبل

لولو : مبروك يا دودو

انا : الله يبارك فيكِ ، عقبالكم يا عيال ، والله الواحد كبر وهو مش حاسس

فوفو : والله عال اصغر واحده وهتتخطب قبلينا هي الدنيا حصل فيها ايه ، ماشي يا ست دودو ربنا يوفقك

انا : عيال هو انا هشتري ايه بالضبط

ام مريم : بصي يا ستي ، هتختاري توينز بلاش الدبله والمحبس دي حاجة قديمة شوي وبعدين حسب فلوسه هتختاري خاتم شيك كده وغويشتين

انا : لا انا مش بحب الغوايش انا هشتري انسيال احسن

لولو : إلي بعجبك المهم تختاري حاجات شيك

انا : انتوا طبعا هتيجوا معايا

فوفو : ايوة بس طبعا انتي إلي هتختاري كل حاجة

انا : ربنا يسهل وحماتي متتدخلش في كل حاجة وتقولي خدي دي وبلاش دي ، طيب اعمل ايه لو عملت كده؟

ام مريم : هوديها واسمعي الكلام

انا : لا طبعا افرضي ذوقها وحش

فوفو : يا بنتي انتي اختاري إلي انتي عايزاه وهي ان شاء الله مش هتتكلم

انا : ربنا يستر

لولو : هما هيجوا امتى بكره ؟

انا : بعد العصر

فوفو : يبقى اكيد هيتغدوا

انا : بجد

فوفو : ايوة طبعا هيتغدوا وبعدين نروح نشتري الدبل

انا : طيب هتعملوا اكل إيه؟

فوفو : هعمل فراخ مشويه ورز بالشعريه وسلطة وباميا

انا : الله يكرمك يا فوفو عقبال ما اتعب في فرحك يارب

وقطع حديثنا رنه موبايلي ووجدتها نمرة غريبة

ولكن تذكرت اني لم اسجل نمرته

فانتظرت حتى انتهت الرنه وقمت بتسجيلها باسم
" خطيبي "

ولكني احترت هل ارن عليه ام لا ؟

ثم قلت مش هرن عليه لما تبقى الحكاية رسمي

انتهى حديثي مع اخواتي وذهبت للنوم بعد ان اخترت طقم يناسب المناسبة

رحت المدرسة اليوم التالي وحكيت لنور إلي حصل امبارح وطبعا قعدت تدعيلي

رجعت من المدرسة بدري شوي علشان ابدا بعمل الماسك وكمان علشان اطمن على الاكل

وبسرعة البرق اذن العصر صليت العصر وقمت البس الطقم



وبعد حوالي نص ساعة

تررررررررررررررن


بابا : اهلا وسهلا اتفضلوا

وجاء ابي وقال : العريس وخاله وامه واخته جم يلا تعالى سلمي عليهم على بال ما اخواتك يحضروا السفرة

دخلت وسلمت على حماتي واخته وبنتها سلمي

وجلست بجوار حماتي

بس طلعت ذوق جدا تعرفوا ليه؟

قامت وعملت زي اخوها المرة إلي فاتت


حماتي : تعالى يا ..( خطيبي ) اقعد جنب خطيبتك

ابتسم وقام وجلس بجواري وانا لا انطق بكلمة

دخلت ماما وسلمت عليهم واخذت في الحوار مع حماتي وبنتها

اما انا وخطيبي فبدأ حوارنا كالتالي


خطيبي : شوفتي ماما بتحبنا إزاي

انا : ازاي؟

خطيبي : خلتني اقعد جنبك على فكرة انا موصيها بكده

فضحكت وقلت : آه علشان كده اول ما قعدت قامت وقالت لك تعالى اقعد جنبي

خطيبي : واحنا ايه يقعدنا بعاد عن بعض احنا مش خلاص قرانا الفاتحة

انا : ايوة بس لسه ملبسناش الدبل

خطيبي : خلاص يا ستي الدبل هنجبها النهاردة ان شاء الله

انا : ان شاء الله

قامت ماما ودخلت المطبخ ثم جاءت لنا وقالت : اتفضلوا يا جماعة على السفرة

خاله : والله مفيش داعي

بابا : ميصحش اتفضلوا

خطيبي : خلينا انا وانتي هنا وهما يتغدوا

انا : لالا مينفعش لازم تتغدى وبعدين مقدرتش اقعد لوحدي

خطيبي : هو انا هكلك

ضحكت وقالت : يلا بس تعالى اتغدى

ودخلنا جميعا إلى السفرة وبما اننا دخلنا متأخرين فكانوا مجهزين كرسيين جنب بعض لينا انا وخطيبي

طبعا انا معرفتش افتح بقي علشان اكل

فضلت ماسكة المعلقة وقعدت العب في الرز شوي

لاحظ خطيبي اني مش باكل


خطيبي : انتي مش بتكلي ليه؟

انا : اصلي والله شبعانه انا قاعدة بس علشان تاكلوا

خطيبي : لا مينفعش لازم تاكلي

انا : بجد انا مش جعانه انا هقوم لحد ما تخلصوا

خطيبي : لا خليكي انتي فاتحة نفسي ولا انتي مش عايزاني اكل

انا : لا خلاص انا قاعدة ، بالهنا والشفا

( وانا كنت ميته من الجوع اصلا بس مش عارفة اكل قدام حد وكمان خطيبي جنبي حاجة محرجة قوي )

وبعد الانتهاء من الاكل قاموا واحد ورا التاني يغسل يده ورحت واقفه عند باب الحمام ومعي الفوطة علشان إلى يخرج ينشف ( متقولوش عامله نظافة )

وجاء الدور على خطيبي ودخل وغسل يده ثم خرج فاخذ مني الفوطة


وقال : عقبال ما ناكل سوا في بيتنا

انا : ان شاء الله

وظل واقف في مكانه حتى جاءت اخته تريد ان تغسل يدها

فقالت له : يا بني امشي بقى البنت وشها احمر من كتر الكسوف

فخرج إلى الصالون ثم قدمنا لهم شاي

وبعدها نزلنا نشتري الدبل

واحنا اخترنا محل متعودين اننا نشتري منه مع ان حماتي كانت عايزة محل تاني


لكن ماما قالت لها : الراجل ده عنده تشكيلة جميلة واحنا متعودين نتعامل معاه

دخلنا المحل وقال خطيبي للرجل : عايزين نشوف تشكيلة الدبل إلى عندك

همست له وقلت : انا عايزة تونز

قال : ايه تونز يعني ايه؟

سمعنا صاحب المحل وقال : ايوة اتفضلوا تشكيلة التونز

الصراحة عرض علينا تشكيلة جميلة جدا

منها









حاولت حماتي التدخل ولكن خطيبي الله يكرمه

كان يقول لي : براحتك شوفي إلى يعجبك وانا هجيبه

اخترت توينز


وبعدين اخترت انسيال



وخاتم




فقال خاله : اختاري يا عروسة كمان خاتم هدية مني ليكي

انا : ميرسي يا عمو

خطيبي : يلا يا ستي اختاري خاتم كمان

فاخترت خاتم كمان



وبعد ما انتهينا دفع خطيبي وخاله الفلوس

وجهز لنا صاحب المحل علبة رقيقة جدا للدهب



ثم اعطها لخطيبي
وقال : ألف مبروك

خطيبي : الله يبارك فيك

ثم قال لي خطيبي : مبروك يا حبيبتي

نظرت له واحسست بسخونه في وجهي " حبيبتي " ايه الكلمة دي

ولم ارد عليه كالعاده

وبعدين قلت ارد عليه وخلاص اكيد غلطه مش يقصدها


انا : الله يبارك فيك

ثم اعطاني علبة الدهب

بابا : اتفضلوا يا جماعة عندنا

خاله : الله يكرمك نشوفكم بكره ان شاء الله

انا : ماتيجي يا طنط عندنا شويه

حماتي : معلشي يا حبيبتي ان شاء الله اجيلك بكره

انا : ان شاء الله

حماتي : مبروك يا حبيبتي

وسلمت عليا

وسلمت على خطيبي وذهبنا الي البيت انا واخواتي وماما وبابا

قعدت البس كل حاجة واجربها اكتر من مرة

الساعة 12 بالليل وجدت رسالة على موبايلي


" أشتاق لك
والشوق
قتال
أحبك والحب
شلال
أهواك والهوى
ميال
ياللي دايم
عالبال

بحبك "


طبعا كانت الرسالة من خطيبي وكان آخر شئ قراته ونمت في الحال كانها منوم

جاء يوم لبس الدبل

طبعا كانت الحفلة عائلية جدا

ماما وبابا واخوي واخواتي وجاء مع خطيبي حماتي وخاله واخته

دخل العريس ببدلته السوداء ومعه كيس به حلويات




ثم جلسوا جميعا بالصالون وعلى اغاني الفرح دخلت بفستاني الروز



وسلمت على الجميع وجلست من كسوفي جنب حماتي

ماما : يا بنتي اقعدي جنب خطيبك هو هيلبس مين الدبل

فقمت من احراجي وقعدت بجانبه

ثم اخذت امي علبة الدهب وفتحتها

اديت لخطيبي يدي اليمنى علشان يلبسني الدبلة


فقال : لا انا عايز الشمال

فضحكت وقالت له : بطل هزار

لبسني التونز

وبعدها الانسيال قعد فيه ربع ساعة علشان يقفله وبعدين لبسني الخاتمين



ثم قبل يدي

شدتها بسرعة واخدت دبلته ولبستها له وكانت ايدي بترتعش جدا

وبعدها جات اخته وبنتها وزوجها عايزين يتصورا معانا

وبعدين حماتي وخاله

وبعديت اخواتي واخي

وبعدين ماما وبابا

وبعدين انا وحبيبي احم احم اقصد خطيبي

وزعوا البيبسي على الجميع وانا وخطيبي جالنا كاسين فيهم البيبسي

وشربنا وانسبطنا وانتهى الحفل البسيط


وكفاية كده دلوقتي لأني طولت عليكم جدا

وإلى اللقاء في الجزء السادس
إقرأ المزيد Résuméabuiyad
السلام عليكم ورحمة الله وبركاته

ومع الجزء السادس من حلمي الوردي

( عين الحسود )

بعد يوم الخطوبة اشتريت علبة شيكولاته لأوزعها على المدرسات بالمدرسة

ونسيت اقول لخطيبي اني هعمل كده

وتفاجأت انه هو ايضا اشترى علبة شيكولاته


انا : ايه ده انت هتوزع شيكولاته في المدرسة النهاردة

خطيبي : ايوة طبعا وكنت جاي انادي عليكي علشان نوزعها سوا

انا : خلاص انت توزع على المدرسين وانا اوزع على المدرسات

خطيبي : طيب يلا تعالى معايا نوزع سوا

انا : اوكي

وبدأنا بتوزيع الشيكولاته وتلقينا التهاني من الكل وفرحولنا كتير

بس طبعا بعد هذه العمله اخدنا عين

لان الكل شافنا مع بعض مبسوطين ومتفقين وبنوزع الشيكولاته كمان

انتهى اليوم الدراسي واثناء خروجي من المدرسة وجدته يتصل بي


انا : سلام عليكم

خطيبي : وعليكم السلام ، ازيك يا حبيبتي ؟

انا : احم . الحمد لله ، انت فين؟

خطيبي : انا وراكِ

التفت وجدته خلفي فضحكت وقلت له : طيب ليه خلتني افتح عليك

خطيبي : ولا يهمك يا حبيبتي

انا : انت خلصت ؟

خطيبي : ايوة وهوصلك لحد البيت وامشي على طول

انا : مش هتطلع ليه ؟ مينفعش

خطيبي : هينفع انا كلمت والدك واستأذنت منه اني اوصلك

انا : طيب قلت له انك مش هتطلع؟

خطيبي : لأ

انا : طيب خلاص يبقى لازم تطلع عندنا

خطيبي : والله مش هينفع خليها مرة تانية

وظهر عليا العصبيه

انا : خلاص بلاش توصلني خالص

خطيبي : وفيها ايه يعني لما اوصلك ومطلعش

انا : فيها كتير

خطيبي : متكبريش الموضوع يا حبيبتي يلا بقى

انا : هو كبير اصلا ، يعني إزاي تيجي لحد البيت ومتطلعش ، الناس يقولوا ايه ؟

خطيبي : انتي كل إللي يهمك الناس ولا انا

انا : انت طبعا ، بس ..

قطع كلامي وقال : خلاص يا حبيبتي متتعصبيش كده هاجي معاكِ

انا : وتطلع !

خطيبي : وهطلع ، خلاص بقى

انا : ايوة كده ، لازم اشخط فيك يعني

خطيبي : بجد ، طيب مش طالع

فضحكنا

خطيبي : انا مكنتش عارف انك بتبقى حلوة كده لما تتعصبي

انا : يا سلام

والحمد لله عدى الموقف على خير

وذهبنا للبيت وماما كانت محضرة لينا الغدا

كنت انا وبابا وخطيبي في الصالون


ماما : يلا يا جماعة الغدا جاهز

خطيبي : معلشي والله يا ماما مقدرش

انا : يلا بقى ماما هتزعل

خطيبي : معلشي والله لازم اروح علشان سايب والدتي لوحدها وانتي عارفه انها مش هتتغدى غير لما اجي

ماما : طيب كل نص اكله وكمل معاها

خطيبي : معلشي يا ماما مرة تانية ، والله انا جيت علشان دودي متزعلش

انا سمعت كلمة دودي وشي احمر ،" دودي " كلمة جميلة جدا اول مرة اسمعها من راجل

" دودي " الله طالعه منه زي العسل

احم احم


انا : طيب علشان خاطري

قلتها بهمس لأن ماما كانت بتكلم بابا مش عارفة بتقوله ايه

فاستغليت الفرصة وقلتها


خطيبي : انا علشان خاطرك ارمي نفسي في البحر

انا : بعد الشر عليك

ماما : يلا بقى تعالوا اتغدوا الاكل هيبرد

وروحنا على السفرة وقعدنا جنب بعض

لكن المرة دي الحمد لله اكلت وقدرت افتح بوقي

خلاص بقى خطيبي

واثناء ما بناكل رن موبايله


فقال : دي ماما

خطيبي : سلام عليكم

حماتي : ....

خطيبي : معلشي يا ماما انا عند خطيبتي كنت بوصلها ومسكوا فيا على الغدا

حماتي : ......

خطيبي : والله نسيت يا ماما معلشي

حماتي : ....

خطيبي : الله يسلمك

حماتي : .......

خطيبي : ماشي ان شاء الله

واغلق مع امه ثم قال : ماما بتسلم عليكوا

ماما : هي قلقت عليك ولا ايه؟

خطيبي : اصلها متعوده اني باجي الساعة 2 والساعة بقت 3 فقلقت عليا

ماما : ربنا يخليها لك

خطيبي : الله يخليكي يا ماما ، والست دودي نستني اتصل بيها علشان اطمنها

انا : والله ما كنت اقصد ، هو انت كنت عايز تطلع اصلا

خطيبي : ولا يهمك يا حبيبتي

انا : اكيد مامتك دلوقتي هتزعل مني ؟

خطيبي : ليه بس ؟

انا : اكيد هتقول انا مخلتكش تتصل بيها

خطيبي : لا ولا يهمك ماما طيبة ومش هتزعل منك ولا حاجة

ثم قام وقال : استأذن انا بقى ، سفرة دايمه

ماما : يا بني اقعد انت لسه مكلتش

خطيبي : لا والله اكلت الحمد لله

وقمت اوصله للباب

انا : مع السلامه

خطيبي : الله يسلمك يا حبيبتي

انا : سلم على طنط كتير

خطيبي : الله يسلمك ، لا إله إلا الله

انا : محمد رسول الله

بعد ما ذهب دخلت طبعا اكمل اكلي

لأني مكلتش علشان اتكلمنا كتير على السفرة ومعرفتش اكل

وبعد ما خلصت اكل دخلت نمت شوية وبعد ما صحيت

لقيت ماما بتقولي

ماما : وداد روحي اتصلي بحماتك

انا : ليه ؟

ماما : اتصلي بيها علشان متزعلش منك لا تقول انك قاصده تأخري خطيبك

انا : خلاص بقى هو هيقولها وخلاص

ماما : اسمعي الكلام ، المكالمة دي هتبسط خطيبك قبل ما تبسط حماتك

انا : حاضر يا ماما

وذهبت اتصل بحماتي

انا : سلام عليكم

خطيبي : وعليكم السلام

انا : ازيك يا ..

خطيبي : الله يسلمك ، خير يا حبيبتي في حاجة ؟

انا : بلاش اتصل بيكم ولا ايه

خطيبي : يعني انتي كويسه؟

انا : الحمد لله هو انا بكلمك ازاي يعني

خطيبي : طيب الحمد لله

انا : ممكن تديني طنط

خطيبي : انتي عايزة ماما !

انا : ايوة

خطيبي : يعني مش بتتصلي علشاني؟

انا : بطل بقى ،اديني طنط

خطيبي : طيب يا ستي ثواني

( ماما كلمي )

حماتي : سلام عليكم

انا : وعليكم السلام ، ازيك يا طنط

حماتي : الله يسلمك يا حبيبتي ، ازيك انتي؟

انا : الحمد لله

حماتي : وازاي ماما وبابا واخواتك؟

انا : الحمد لله بخير بيسلموا على حضرتك، معلشي يا طنط والله .. كان بيوصلني وانا صممت انه يجي يتغدى ومكنتش اعرف ان حضرتك مستنياه

حماتي : ولا يهمك يا حبيبتي ، المهم انكم بخير

انا : ربنا يخليكي يا طنط ، انا بس مش عايزه حضرتك تزعلي مني

حماتي : لا يا حبيبتي انا اقدر ازعل من بنتي

انا : ربنا يخليكي يا طنط

حماتي : يلا خدي كلمي خطيبك عمال بيشاور لي عايز يكلمك

انا : ماشي يا طنط خليني اكلمه

خطيبي : انا مش عارف اقولك ايه ، انتي رائعة

انا : ليه ده كله؟

خطيبي : بجد مكالمتك دي زودت غلوتك عندي ، ربنا يخليكي ليا

انا : ويخليك ليا ، سلملي على اختك والبنوته سلمى

خطيبي : الله يسلمك ، لا إله إلا الله

انا : محمد رسول الله

ومرت الأيام

وكان خطيبي يزورنا كل خميس

ومرة من المرات فتح معي موضوع .......


يا ترى موضوع ايه ؟؟؟
تابعوني في الجزء القادم
إقرأ المزيد Résuméabuiyad
السلام عليكم ورحمة الله وبركاته
الجزء السابع ( حماتي )

مرة من المرات فتح معي موضوع حماتي

خطيبي : انا كنت عايز اكلمك في حاجة كده

انا : خير ان شاء الله

خطيبي : انا عايز منخليش والدتي تحس اني بعدت عنها ، يعني انتي عارفة انها ست كبيرة وقاعدة لوحدها

انا : قبل ما تكمل انا عارفة انت عايز تقول ايه، صدقني والدتك زي ماما بالضبط وإلي مش هقبله على ماما مش هقبله على والدتك وانا هراعيها

خطيبي : ربنا يخليكي ليا ، يعجبني فيكي انك فاهماني على طول

انا : انا بقى عايزة اقول لك على حاجة

خطيبي : قولي يا حبيبتي

( كل ما يقول حبيبتي دي ببقى مش عارفة اتكلم )

انا : انا مش هسيب مامتك ابدا ومش هحسسها ابدا باي وحده ، واطمن انا هكون معاها على طول، وهحاول اغلب الوقت نكون عندها

خطيبي : ربنا يخليكي ليا يارب ، انا مش عارف اقول لك ايه ، الموضوع ده كنت شايل همه ، ومكنتش عارف افتحه معاكِ إزاي

انا : ولا يهمك يا .. دا موضوع اصلا مش عايز كلام

( حمدت ربنا في سري انه اكتفى فقط باننا ما نبعد عن امه كنت خايفه يقول نقعد معاها علشان هي قاعدة لوحدها لكن الحمد لله كان عايز بس يتأكد اني هراعي امه )

خطيبي : طمنتيني ربنا يطمن قلبك ، بصي بقى انا الحمد لله كانت والدتي مدخلاني في جمعيه وهقبضها الشهر ده هي صحيح مش كبيرة لكن ان شاء الله ربنا يقدرني واجيبلك كل إلي انتي عايزاه

انا : انا مش فاهمه حاجة ، هو فيه إيه؟

خطيبي : عايز اشتريلك الشبكة يا حبيبتي



انا : بجد

( وكنت هقوم ازغرد بس قلت بلاش هبل اهمد شويه )

خطيبي : انا هيكون معايا ان شاء الله 8 آلاف جنيه على يوم الخميس ، انا عارف انه مبلغ بسيط وان قيمتك عندي اغلى من كده بكتير و..

قاطعته وقلت : متكملش ولو مفيش شبكة خالص متشيلش هم

خطيبي : وانا مقدرش مجيبلكيش شبكة

انا : ربنا يخليك ليا

خطيبي : ويخليكي ليا ، انا عايز والدك علشان اكلمه في الشبكة ونحدد يوم نشتري الشبكة

ذهبت انادي على بابا هو كان جالس في الأنترية إلي بيطل على الصالون ، يعني طبعا شايفني انا وخطيبي بس الصوت مش مسموع قوي



انا : بابا خطيبي عايز يكلمك

بابا : حاضر يا حبيبتي

ودخل ابي الصالون وجلس معنا

خطيبي : انا يا عمي ان شاء الله على آخر الأسبوع هيكون معايا 8 آلاف جنية وعايز اشتري لوداد الشبكة

بابا : ربنا يوفقك يا بني ، على خيرة الله

خطيبي : انا عارف يا عمي ان المبلغ صغير

بابا : ولا يهمك يا بني ربنا يقدرك

خطيبي : بعد إذن حضرتك ممكن نشتري الشبكة يوم الجمعة الجاي ان شاء الله

نظر بابا لي وقال : انتي ايه رايك تشتري الشبكة يوم الجمعة

انا كنت عايزة اقول لبابا ( ايوة طبعا يا بابا بس قلت خليني هادية شويه واخلي الرد من بابا )

انا : إلي تشوفه يا بابا

بابا : خلاص يا بني على بركة الله يوم الجمعة نروح نشتري الشبكة

خطيبي : ان شاء الله يا عمي

استأذن خطيبي ومشي

وبعدين حكيت لأخواتي وفرحوا جدا وباركوا لي

بس افتكرت شئ مهم جدا

فرح الشبكة على العروسة

وخطيبي هيجيب الشبكة آخر الأسبوع يعني المفروض بالكتير الفرح يكون الاسبوع إلي بعده

طيب انا اعمل ايه دلوقتي المفروض إني بشتغل ومخليش بابا يتحمل مصاريف حاجة

بس انا وبكل اسف فلوسي بتخلص قبل ما تيجي

وقطع تفكيري صوت بابا ينادي عليا انا واخواتي


بابا : يلا عايزة تعملي الفرح فين؟

انا : بس انا يا بابا مش عامله حسابي على حكاية الفرح دي

بابا : ومين قالك انك هتدفعي فلوس

انا قلت بابا مش واخد باله ان فرح الشبكة على العروسة

انا : بابا الفرح على العروسة

بابا : انا عارف يا بنتي ، انا هدفعلك كل حاجة انتي شايلة الهم ليه

انا : ربنا يخليك ليا يا بابا كان نفسي والله اساعدك في حاجة بس معلشي بقى تترد لك في فرح حد من اخواتي هههههههههههههه

بابا : انا هروح بكره ان شاء الله اشوفلك مواعيد القاعات وتختاري اليوم إلى يعجبك

انا : ماشي يا بابا ، بس خليها الاسبوع الجاي

بابا : ان شاء الله

وجاء اليوم التالي

وبابا جاب مواعيد القاعات اتصلت بخطيبي طبعا علشان ما احددش المعاد لوحدي واتفقنا على يوم الاربعاء يكون هو الشبكة

لم افعل شئ طوال الاسبوع حتى جاء يوم شراء الشبكة

جه عندنا خطيبي ومامته واخته وخاله وخالته وبنت خالته

طبعا كنت اول مرة اشوف خالته وبنت خالته

ضيفناهم واتغدوا وبعدين روحنا نشتري الشبكة


كفاية كده النهاردة

وإلى اللقااء مع الجزء الثامن


( الشبكة )

إقرأ المزيد Résuméabuiyad