السلام عليكم ورحمة الله وبركاته

اسعد الله يومكم بكل خير

الوقت عدى بسرعة

وها انا اكتب آخر جزء من حلمي الوردي

ويارب يرزق كل بنات المسلمين بالأزواج الصالحين

ومع الجزء الأخير


( ليلة الدخلة )

صحيت من بدري لأني طول الليل اتقلب يمين وشمال ومش عارفة انام خالص

ماما اول ما شفتي


ماما : ايه ده عنيكي عامله كده ليه يا بنتي ؟ هو انتي منمتيش امبارح كويس ؟

انا : ايوة يا ماما معرفتش انام

ماما : طيب يا حبيبتي هعملك تفطري وبعدين تدخلي تريحي شويه

انا : اريح ايه بقى مفيش وقت لازم اخلص الحاجات إلي ورايا

ماما : طيب ادخلي خدي دش وانا هكون حضرت لك الفطار

دخلت اخدت دش وطلعت فطرت وبعدها لقيت ماما بتجهز الاكل علشان تاخده البيت عندي وعند حماتي كمان

( من عاداتنا ان ام العروسة بتودي عشا الاتفاق في بيت العروسة وتودي زيه عند حماتها )

وماما فعلا عملت كده ودت عندي وعند حماتي نفس الاكل تقريبا

اما انا بقى روحت اريح جسمي على السرير لحد الظهر لأني حسيت بدوخه


ولما رجعت لماما قالت لي : بصي يا حبيبتي انا حطيت الاكل عندك على السفرة اول ما توصلوا تاكلي انتي وزوجك

انا : حاضر

بعد ما خلصت الغدا لبست وروحت عند الكوافيره يعني قبل العصر بحاجه بسيطة

كانت لولو وفوفو معايا وصديقتي نور

وماما وام مريم ومرات اخي في البيت بيستقبلوا الناس إلي بتيجي ويغدوهم

اما بقى الكوافيره قعدت تعمل في ماسكات وحاجات كتير جدا

بعد العصر كان الإشهار

يعني الرجاله بيروحوا الجامع يعملوا كتب الكتاب تاني لمجرد الاشهار والناس كلها بتبقى عارفه كده

وفعلا بعد العصر لقيت ماما بتتصل بيا على الموبايل


ماما : بابا واخوكِ وباقي الرجاله راحوا الجامع وزوجك و الرجاله إلي معاه راحوا

انا : طيب يا ماما كويس

ماما : مش عايزة حاجة يا حبيبتي

انا : لأ شكرا يا ماما

ماما : مع السلامه

انا : الله يسلمك

وبعد ما خلصوا كتب الكتاب لقيت زوجي بيتصل بيا ويطمني ان كل شئ تمام وكتب الكتاب خلص

فضلت في الماسكات والحاجات الكتيرة دي لحد المغرب

وبعدين بدأت ألبس الفستان وعملت المكياج كانت العشا بتأذن

اتأخرت شويه عن المعاد إلي المفروض اخلص فيه لدرجة ان زوجي والعربيات كلهم واقفين على باب الكوافيره مستنين خروجي

الحمد لله خلصت على الساعة 9

دخل زوجي علشان ياخدي من عند الكوافيره اول ما شافني مسك ايدي وباس راسي

الكل قعد يصفر والبنات تزغرد وطلعنا ركبنا العربيه

وطول ما احنا بالعربية ماسكين ايد بعض نتعاهد على اننا ما نفترق ابدا

وصلنا للأستوديو علشان نتصور صور الزفاف

دخلت انا وزوجي اوضة التصوير

قعد المصوراتي يطلب منا حاجات


المصوراتي : بصوا لبعض وحطي ايدك على كتفه وانت حط ايدك في وسطها

علشان الحركة دي اكتشف خطيبي اكتشاف فظيع جدا فيا

اكتشف اني بغير جدا جدا ومكنتش قادرة امسك نفسي من الضحك

لحد ما هديت خالص وبعدين اخدنا الصورة بسلام

حركة تانية للتصوير


المصوراتي : اقعدي يا عروسة على الكرسي وانت اقف جنبها وحط ايدك على كتفها

حركة كمان

المصوراتي : يا عروسة خلى ظهرك للعريس وميلي راسك عليه وانت امسك وسطها

حركة لوحدي اخيرا

المصوراتي : ابعد يا عريس خالص وانتي يا عروسة امسكِ البوكيه ده وبصي للبوكيه مع ابتسامه بسيطه



والحمد لله خلصنا على كده التصوير

قعدنا حوالى ساعة عنده

بعد كده طلعنا على القاعة وكان المعازيم كلهم بإنتظارنا دخلنا القاعة وقعدنا انا وزوجي

واشتغلت الاغاني وبدأ الرقص يشتغل


جت اخت العريس مسكت ايدي وايد زوجي وقالت : يلا قوموا ارقصوا مع بعض

نزلنا انا وزوجي على البست ( مكان فاضي امام الكوشه ) والبنات عملوا دايرة حولينا والشباب وراهم دايرة اكبر

وبدأنا نرقص لحد ما تعبنا

وبعدين روحنا على الكوشه وفضلوا الشباب هما إلي يرقصوا

اشتغلت اغنية هادية يعني لازم نرقص slow

نزلنا من الكوشة ورقصنا صلو مع بعض

وبعد كده قعدنا علشان الحاجة الصاقعة بتتوزع وبعدها روحنا مغيرين مكان الدبل من اليمين للشمال

جه المسئول عن القاعة ومعاه كاسين لينا



انا مسكت كاس وزوجي كاس


وقف في الوسط وقال : شربوا بعض

وبعدين قال : لفوا اديكوا حولين بعض وشربوا نفسكم ( حركة غريبة جدا بس الحمد لله عملناها )

وبعدين اخد الكاس مني وقال لزوجي : اشربوا انتوا الاتنين من كاس واحد

طبعا رفضت بس زوجي قال لي : بصي هنمثل اننا بنشرب من كاس واحد وهسيبه ليكي تشربي منه

انا : ماشي

وجيت اقرب من الكاس راح بايس راسي

اتحرجت جدا وقلت له : كده ، ماشي مش هسمع كلامك تاني

بعد كده اخدوا منا الكاسات وشويه وبعدين قومنا علشان التورتة وصلت



روحت انا وزوجي نقطعها فمسكنا السكينة



ايده فوق ايدي وقطعنا التورتة من فوق لتحت

جه المسئول تاني الله يسامحه جاب طبق وحط فيه قطعة من التورتة وإدانا كل واحد شوكة وعملنا زي الكاسات بالضبط

وجينا على مسك شوكة واحده قلت :لالالالا كلها انت انا مش عايزة حاجة


راح زوجي اداني الشوكة وقال : كلي انتي يا حبيبتي

واكلني هو بدل ما احنا الاتنين ناكل من شوكة واحده ( بلاش قلة ادب هههههههه )

خلص الفرح على الساعة واحده بالليل ركبنا العربيات

اهلى كلهم وصلوني لحد البيت

سلمت على ماما

وانا وهي بنعيط

وجه بابا قال : انتي بتعيطي ليه بس دا انتي في نفس البلد يعني في اي وقت ممكن نجيلك يا حبيبتي

وهو بيقول آخر كلمة دي كان هو كمان صوته اتغير علشان ماسك نفسه قدامي ومش عايز يعيط

دخلت الشقة انا وزوجي ومحدش دخل معانا لأنه مش المفروض حد يدخل مهما كانت صلة القرابه

قعدنا في الانترية شويه وبعدين قال لي: انا مش مصدق انتي خلاص بقيتي ليا انا لوحدي

انا : وهفضل طول عمري ليك يا حبيبي

سألته عايز تاكل ؟ كنت متوقعه يقول لأ

رد عليا وقال : ياريت دا انا ميت من الجوع

المهم روحنا على السفرة وقعد ياكل وانا مش جايلي نفس خالص

اتحايل عليا كتير اني اكل بس مقدرتش وسيبته ودخلت اغير لبسي وقفلت على نفسي بالمفتاح لحد ما خلص اكل وبعدين خبط عليا

مكنتش عايزة ههههههههههه

تاني يوم الصبح


( يوم الصباحيه )

صحينا وفطرنا وكله تمام

المفروض ان ام العروسه تيجي من بدري جدا


لكن احنا عندنا في البيت ماما قالت : هجيلك على الساعة 11 الظهر

وفعلا جت ماما وبابا واخويا ومراته واخواتي

قدمت لهم عصير وقعدنا نتكلم على الفرح

وإللي حصل فيه وكلام كتير

وبعدين شربوا العصير وشويه وقاموا مروحين


زوجي : خليكوا يا جماعة اتغدوا معنا

بابا : بالهنا والشفا

وقبل ما يخرجوا كل واحد نقطني بفلوس

بابا قال : ان شاء الله بعد اسبوع هتروحوا تصيفوا في مرسى مطروح علشان انا حجزت لكم

انا وزوجي : ربنا يخليك لينا يا بابا

وكانت الزيارات طوال الاسبوع وفي كل وقت

لحد ما خلص الاسبوع وروحنا على مرسى مطروح وقضينا اسعد الايام


سيف : وبعدين يا ماما

انا : وبعدين ولدت اختك سيسل وبعدين انت يا سيف ، يلا بقى علشان تنام

وتوته توته خلصت الحدوته حلوة ولا منتوته؟؟؟؟؟؟؟؟؟

تمت بحمد الله

أنتظروني في قصص أخرى جديدة من تأليفي
abuiyad
6 Responses
  1. الله عليكي تسلم الايادي يااااااارب
    بس خسارة انها خلصت :(
    انا ادمنتها خلاص ههههههه
    مشكورة ياقلبي على ابداعك الرقيق
    وفي انتظار كل جديد منك

    تقبلي خالص تحياتي وتقديري لشخصك الرائع :) :) :)


  2. روووعه يا دودو

    ربنا يخليلك سيف وسيسل

    في انتظار قصص اخرى


  3. tote soly Says:

    وأخيراً اتجوزت ولحد له عندى حاجه

    مبروك يا دودو قصة رائعة عشناها كأنها حقيقية
    الفرح كان جميل والكل بيتكلم عليه

    وننتظر منك تأليفات أخرى بهذه الجوده الرائعه


  4. وداد Says:

    صحبة التغيير

    اشكرك حبيبتي على متابعتك الجميلة لقصتي

    الله ما يحرمني منك حبيبتي

    ولا تحرمينا من زيارتك


  5. وداد Says:

    اشكرك يا دكتورة ولاء

    الاروع مرورك ومتابعتك لقصتي

    الله يعطيكِ العافيه


  6. وداد Says:

    اشكرك يا توتي

    وان شاء الله تشوفي قصص تانية

    ادعيلي


إرسال تعليق

السلام عليكم ورحمة الله وبركاته

يسعدني مرورك ويزيدني شرفاً تعليقك